Drejtues të Federatës së Futbollit Shqiptar në Gjermani dhe të Unionit Shqiptar të Futbollit në Zvicër janë pritur në një takim nga ministri i Sportit, Blerim Gashani, ku u diskutua për rolin e sportit në forcimin e lidhjeve të diasporës me atdheun dhe mbështetjen institucionale për aktivitetet sportive të shqiptarëve jashtë vendit.
Gjatë takimit, kryetari i Federatës së Futbollit Shqiptar në Gjermani, Afrim Osmanaj, prezantoi punën dhe aktivitetet e federatës, e cila bashkon mbi 40 klube shqiptare nga qytete të ndryshme të Gjermanisë. Ai vlerësoi sportin si një mjet të rëndësishëm për ruajtjen e identitetit kombëtar, gjuhës dhe kulturës shqiptare te brezat e rinj në diasporë.
Sipas Osmanajt, aktivitetet sportive kanë ndihmuar në krijimin e lidhjeve të forta mes të rinjve shqiptarë, duke nxitur njohjen, bashkëpunimin dhe komunikimin në gjuhën shqipe.
Një pjesë e veçantë e diskutimit iu kushtua turneut tradicional të klubeve shqiptare në Gjermani, i cili do të zhvillohet më 27 dhe 28 qershor në Frankfurt. Në këtë aktivitet pritet të marrin pjesë më shumë se 30 klube shqiptare nga mbarë Gjermania.
Ndërkohë, anëtari i Komitetit Ekzekutiv të FFK-së, Enver Muzliukaj, nënvizoi nevojën për mbështetje më të madhe institucionale ndaj organizatave sportive të diasporës, duke shprehur pritshmëri për angazhim edhe nga institucionet përgjegjëse për diasporën.
Sipas burimeve të AL News, ministri Gashani shprehu gatishmërinë për të mbështetur iniciativa të tilla dhe u dakordua që bashkëpunimi të vazhdojë edhe me institucionet e tjera relevante, përfshirë strukturat përgjegjëse për diasporën.
Në fund të takimit, përfaqësuesit e federatave shqiptare i adresuan ministrit një ftesë për të marrë pjesë në turneun e sivjetmë në Frankfurt, duke e cilësuar praninë e tij si një vlerësim të rëndësishëm për komunitetin sportiv shqiptar në diasporë.