Një pyetje e papritur iu drejtua kreut të SPAK, Altin Dumani, ndërsa raportonte në Kuvend për aktivitetet e Prokurorisë së Posaçme. Deputeti Denis Deliu ngriti shqetësimin për lajmet dezinformuese që qarkullojnë në portalet e vendit, të cilat pretendojnë se turizmi në Shqipëri po vuan për shkak të çmimeve të larta dhe plazheve të zbrazura. Ai sugjeroi se këto mund të jenë të ndikuara nga shërbimet inteligjente të huaja.
“Turizmi është shumë i rëndësishëm për Shqipërinë, dhe kohët e fundit kemi parë nëpër portale një sabotim të turizmit. Sivjet ka një rritje të nivelit të dezinformimit. A ka hapur SPAK një hetim për sabotazh kundrejt këtij fenomeni nga shërbime të huaja inteligjente? A ka informacione nga SHISH dhe struktura të tjera? Mendoj që këto lloj dezinformimesh dëmtojnë ekonominë shqiptare,” tha Deliu.
Në përgjigje, Dumani deklaroi se nuk ka informacion lidhur me këtë çështje. “Nuk kemi informacion apo diçka për të ndarë sa i përket kësaj pyetjeje,” u shpreh ai.