Një ndërtesë shtatëkatëshe u shemb mëngjesin e sotëm në provincën Kocaeli, në veriperëndim të Turqisë, duke shkaktuar panik dhe mobilizim të menjëhershëm të ekipeve të emergjencës.
Sipas mediave turke, pesë persona, të gjithë anëtarë të së njëjtës familje, kanë mbetur të bllokuar nën rrënoja.
Në vendngjarje ndodhen ekipet e kërkim-shpëtimit, të cilat po punojnë pa ndërprerje për të gjetur të mbijetuarit. Guvernatori i Kocaelit, İlhami Aktaş, deklaroi se shkaku i shembjes ende nuk është përcaktuar, ndërsa theksoi se prioritet mbetet shpëtimi i personave të bllokuar.
“Pesë anëtarë të një familjeje ndodheshin brenda ndërtesës në momentin e incidentit,” u shpreh Aktaş.
Ndërkohë, Ministri i Brendshëm turk, Ali Yerlikaya, bëri të ditur se në operacion janë përfshirë 147 punonjës shpëtimi, përfshirë 80 efektivë policie e zjarrfikës, si dhe ekipe nga organizatave joqeveritare dhe bashkitë lokale.
Në terren po përdoren tetë pajisje zbulimi, dy dronë dhe 52 automjete për kërkimet nën rrënoja.
Sipas hetimeve paraprake, shembja mund të jetë shkaktuar nga punime nëntokësore që po kryheshin në afërsi të godinës, megjithatë autoritetet nuk kanë dhënë ende një konkluzion përfundimtar.