Kryeministri Edi Rama përcolli sot në rrjetet sociale pamje nga një tjetër operacion për lirimin e hapësirave publike, këtë herë në zonën e Farkës. Në to, shfaqet shembja me tritol e një kompleksi vilash të ndërtuara pa leje nga Inspektorati Kombëtar i Mbrojtjes së Territorit (IKMT).
Rama theksoi se “nuk mund të ndërtohen vila të shtrenjta për qëllime fitimi në dëm të ligjit dhe në kurriz të komunitetit”. Ai shtoi: “Operacioni nuk do të ndalet askund dhe përballë askujt, deri kur askush të mos guxojë të ndërtojë metra katrorë pa leje.”
Operacioni kombëtar, i nisur në korrik dhe pjesë e vizionit “Rilindja Urbane 2.0”, synon rikthimin e ligjshmërisë në territor dhe krijimin e më shumë hapësirave publike për qytetarët. Ai përfshin ndërtues, mbikëqyrës dhe inspektorë që shkelin kushtet e lejeve për vila dhe godina të shtrenjta, të cilët përballen me masa administrative dhe penale sipas legjislacionit në fuqi.
Për të lehtësuar denoncimin e abuzimeve, qytetarët mund të përdorin portalin Hapësiraimepublike.gov.al
. Deri më sot, nga 15,310 raste të raportuara, janë zgjidhur 11,686, ndërsa 3,624 raste janë aktualisht në proces shqyrtimi.