Martin Jaeger, kreu i shërbimit gjerman të inteligjencës BND, paralajmëroi se Rusia përbën një kërcënim të drejtpërdrejtë për Evropën dhe se “paqja e tensionuar” mund të shpërthejë në çdo moment në një konfrontim të nxehtë.
Jaeger u shpreh para ligjvënësve se Rusia synon të zgjerojë ndikimin e saj drejt Perëndimit, dhe se nuk do të hezitojë të përballet drejtpërdrejt me NATO-n nëse është e nevojshme. Ai e përmendi Gjermaninë si “caku numër një i Rusisë”, duke theksuar rëndësinë e saj si ekonomi më e madhe e BE-së dhe roli udhëheqës në mbështetjen e Ukrainës.
Deklaratat vijnë pas një serie incidentesh në BE, përfshirë inkursione dronësh rusë në Poloni dhe shkelje të hapësirës ajrore të Estonisë. Gjermania dyshon gjithashtu për fushata sabotimi dhe dezinformimi nga Rusia, përfshirë incidente që ndërprenë operimin në Aeroportin e Munihut.
Sipas Jaeger, ambiciet dhe agresioni i Rusisë nuk kufizohen vetëm në luftën në Ukrainë, duke rrezikuar stabilitetin dhe sigurinë në të gjithë kontinentin evropian.