Ekspertët amerikanë paralajmërojnë për përhapjen e një varianti të gripit, të quajtur “supergripi”, i cili po rrit ndjeshëm numrin e shtrimeve në spitalet e SHBA-së. Qendra për Kontrollin dhe Parandalimin e Sëmundjeve raportoi një rritje prej 14.3% të shtrimeve që nga e premtja, me përqendrim të lartë në Nju Jork, Luiziana dhe Kolorado.
Raste të konsiderueshme janë regjistruar edhe në Nju Xhersi, Rod Ajlend, Xhorxhia, Nju Meksiko, Miçigan dhe disa shtete të tjera. Ekspertët theksojnë se virusi po përhapet shpejt dhe se vaksina e këtij viti nuk mbulon llojin më të përhapur të gripit A, i cili ka shkaktuar numrin më të madh të vdekjeve te të moshuarit.
Simptomat e gripit përfshijnë ethe, dridhje, kollë, dhimbje fyti, dhimbje muskujsh, lodhje dhe herë pas here të vjella ose diarre. Megjithatë, shumica e pacientëve shërohen brenda disa ditësh ose javësh, ndërsa ndërlikimet si pneumonia mund të jenë serioze. Ekspertët rekomandojnë vaksinimin e zakonshëm për të lehtësuar simptomat dhe për të reduktuar rrezikun.