Sekretari amerikan i Energjisë, Chris Wright, deklaroi se rreth 20 milionë fuçi naftë të papërpunuar kanë kaluar përmes Ngushticës së Hormuzit gjatë 24 orëve të fundit.
Gjatë Forumit Global të Energjisë të Reuters në New York, ai theksoi se Shtetet e Bashkuara do të garantojnë vazhdimësinë e furnizimit me naftë përmes kësaj rruge strategjike, edhe në mungesë të një marrëveshjeje të qëndrueshme me Iran.
Ngushtica e Hormuzit, një nga korridoret më të rëndësishme energjetike në botë, mbetet pikë kyçe për eksportet e naftës dhe gazit nga vendet e Gjirit Persik, përmes së cilës kalon një pjesë e madhe e furnizimeve globale.
Të dhënat detare tregojnë se trafiku i tankerëve është rikthyer në nivele më të qëndrueshme, pas një periudhe tensionesh që kishin rritur shqetësimet për ndërprerje të mundshme të furnizimit.
Ky stabilizim i lëvizjes së anijeve ka ndikuar edhe në tregjet ndërkombëtare, ku çmimet e naftës kanë shënuar rënie, pasi është ulur “premiumi i rrezikut gjeopolitik” që kishte ndikuar më herët në rritjen e tyre.