Kreu i BDI-së, Ali Ahmeti, ka komentuar protestat e fundit në Shqipëri, duke i cilësuar si zhvillime që, sipas tij, po dëmtojnë interesat e vendit dhe po ndikojnë negativisht në ekonomi, veçanërisht në sektorin e turizmit dhe investimeve.
Duke folur në Kuvendin e BDI-së, Ahmeti vlerësoi rolin historik të Shqipërisë në mbështetjen e Kosovës, por tha se situata aktuale po shoqërohet me pasoja që, sipas tij, vijnë edhe nga ndikime të jashtme.
Ai përmendi si burime të mundshme ndikimi Greqinë dhe Beogradin, duke pretenduar se fushatat kundër Shqipërisë po lidhen edhe me zhvillimet rajonale.
“Ka protesta që nuk dihet ku e kanë kokën, dhe që kanë rënë në grackën e armiqve të Shqipërisë,” u shpreh Ahmeti, duke shtuar se qëndrimi i tij nuk është në mbrojtje të qeverisë, por në mbrojtje të interesit të Shqipërisë.
Sipas tij, pasiguria e krijuar nga këto zhvillime mund të ndikojë negativisht tek investimet dhe tek turizmi, të cilin e cilësoi si një nga shtyllat kryesore të ekonomisë shqiptare.
Ahmeti theksoi gjithashtu se destabilizimi i vendit, sipas tij, ka pasoja jo vetëm brenda Shqipërisë, por edhe në rajon, duke i bërë thirrje për kujdes në mënyrën se si interpretohen dhe zhvillohen protestat publike.