Drejtoria e Përgjithshme e Tatimeve (DPT) njofton se tatimpaguesit që kanë marrë përgjigje negative për përfitimin nga ligji i faljes së detyrimeve tatimore kanë të drejtë të kërkojnë rishikim të rastit të tyre.
Sipas njoftimit zyrtar, subjektet duhet të paraqesin kërkesë ose ankesë pranë Drejtorisë Rajonale Tatimore përkatëse, të shoqëruar me dokumentacionin provues sipas rastit. Administrata Tatimore do të shqyrtojë çdo kërkesë dhe, nëse plotësohen kushtet ligjore, do të ndërmarrë veprimet për përfitimin e parashikuar nga ligji për fshirjen ose shuarjen e detyrimeve tatimore.
Pak ditë më parë, administrata Tatimore përmbylli procesin automatik të fshirjes dhe shuarjes së detyrimeve për kategoritë e përcaktuara në ligjin për faljen e detyrimeve tatimore qendrore, vendore dhe doganore.
Sipas Drejtoria e Përgjithshme e Tatimeve, nga ky proces kanë përfituar 105,409 tatimpagues, me një vlerë totale prej rreth 91.6 milionë euro detyrimesh të fshira dhe të shuara.
Nga kjo shumë, 70.5 milionë euro i përkasin gjobave administrative të vendosura nga inspektorët tatimorë për detyrime të papaguara deri në periudha të caktuara ligjore, ndërsa 21.1 milionë euro lidhen me gjoba të tjera administrative, përfshirë vonesat në deklarimet tatimore.
Administrata Tatimore thekson se procesi mbetet i hapur për shqyrtim rast pas rasti, në varësi të plotësimit të kushteve ligjore nga tatimpaguesit.