Një incident alarmant është regjistruar në BBC, pasi një punonjës i kompanisë mori një mesazh nga një grup kriminal që i ofronte shuma të mëdha parash në këmbim të aksesit në sistemet e brendshme të rrjetit mediatik.
Grupi, që identifikohet si “Syndicate”, i premtoi punonjësit një përqindje të një shpërblimi në bitcoin, nëse ai do t’u siguronte të dhënat e hyrjes në kompjuterët e tij të punës.
Në mesazhin e dërguar, ata i shkruanin:
“S’do të kesh më nevojë të punosh kurrë… Ne do ta fshijmë këtë chat që të mos gjendesh kurrë.”
Sulmuesi u prezantua si “menaxher kontakti” i grupit kibernetik Medusa, i njohur për operacionet ransomware-si-shërbim, ku bashkëpunëtorë të ndryshëm përdorin platformën për të sulmuar organizata në këmbim të fitimeve të përbashkëta.
Ai përmendi edhe dy shembuj të mëparshëm suksesesh: një kompani shëndetësore në Mbretërinë e Bashkuar dhe një ofrues shërbimesh emergjente në SHBA, të cilat janë hakuar më herët këtë vit.