Kryeministri Edi Rama ka hedhur poshtë pretendimet se Ishulli i Sazanit është shitur, duke theksuar se ai mbetet pronë e Republikës së Shqipërisë dhe se lajmet për shitjen e tij janë të pavërteta. Gjatë një takimi me operatorët turistikë në Vlorë, ai u shpreh se negociatat për projektin nuk kanë përfunduar ende dhe se shteti shqiptar do të jetë pjesë e kompanisë së përbashkët që do të investojë dhe administrojë ishullin.
“Këtu flitet shumë për gjithçka dhe bëhen fakte gjëra të pavërteta, marrin dhenë. Është hapur gjithandej se qeveria ka shitur ishullin e Sazanit, kjo nuk është e vërtetë. Sazani është pronë e Republikës së Shqipërisë dhe do të mbetet pronë e Republikës së Shqipërisë,” deklaroi Rama.
Ai shtoi se aktualisht nuk ka një marrëveshje të përfunduar dhe se shteti do të jetë i përfshirë drejtpërdrejt në projekt. “Sot që flasim nuk e kemi përfunduar negociatën për Sazanin. Shteti shqiptar do jetë pjesë e kompanisë së përbashkët që do investojë dhe do administrojë ishullin. Pra, shqiptarët janë të përfaqësuar nga shteti,” u shpreh ai.
Rama nënvizoi gjithashtu se projekti nuk do ta izolojë ishullin nga publiku dhe se nuk do të ndërtohet një resort i mbyllur. “Nuk bëhet fjalë për të mbyllur ishullin. Nuk do jetë një resort i mbyllur,” tha kryeministri, duke shtuar se projekti ka pësuar ndryshime dhe do të ketë një profil të rëndësishëm kulturor e artistik.
Në vijim, ai theksoi ndikimin që pritet të ketë zhvillimi në ekonominë lokale. “Do jetë një zhvillim që do i rrisë vlerën gjithë investimeve këtu. Se ata që shohin ngushtë, nuk kanë si ta kuptojnë se çfarë impakti ka një zhvillim i tillë. Do rritet vlera e pronës për të gjithë vlonjatët, për të gjitha investimet e reja që po bëhen. Ata që nuk shkojnë dot atje, do kenë dëshirë të jenë afër saj, do sjellë vetëm të mira për Vlorën,” përfundoi Rama.