Ervin Salianji ka ironizuar ashpër organizimin e protestave dhe takimeve të fundit të Partisë Demokratike, duke deklaruar se sot PD po mbledh më pak qytetarë para Kryeministrisë sesa Shoqata e Gjuetarëve të Korçës mblodhi në vitin 2021.
Duke folur në një takim me demokratët, Salianji solli si shembull një protestë të zhvilluar tre vite më parë, kur ai kërkoi mbështetjen e shoqatës së gjuetisë në Korçë për kundërshtimin e moratoriumit të gjuetisë.
“Në vitin 2021 kërkova takim me Shoqatën e Gjuetarëve të Korçës. Ata kishin shqetësim moratoriumin dhe më thanë: nuk duam ndihmë nga partia, por duam ta heqim moratoriumin në Parlament dhe do ta shihni sa njerëz do të mbledhim. Dega e Korçës mblodhi 200 veta në protestë. Ndërkohë sot, PD nuk e kupton pse mbledh tre herë më pak njerëz para Kryeministrisë”, u shpreh Salianji.
Ai theksoi se kjo ndodh pavarësisht faktit se, sipas tij, ekziston një pakënaqësi e madhe qytetare ndaj qeverisë së Edi Ramës dhe se PD ka pasur rreth 500 mijë votues, ndërsa sot janë edhe mijëra të tjerë kundër qeverisë.
Salianji kritikoi gjithashtu justifikimin se demokratët kanë frikë nga “regjimi”, duke theksuar se ata nuk janë trembur as në periudha shumë më të vështira.
“Demokratët nuk kanë pasur frikë nga regjimi tjetër që të vriste. Ja si është mbushur salla sot, ashtu siç është mbushur në çdo qytet të Shqipërisë”, tha ai.
Në vijim, Salianji sulmoi drejtimin aktual të Partisë Demokratike, duke nënvizuar se ai vetë ka paguar kosto personale në përballjen me qeverinë.
“Kam mbajtur kosto nga kjo qeveri. Kur unë kam bërë burg, shumë të tjerë kanë marrë leje, tendera dhe kanë bërë para. Si mund të thuhet që problemi për PD jam unë dhe ju, që e kemi përballur Edi Ramën, dhe jo ata që ai i dërrmon në çdo palë zgjedhje që nga viti 2013”, u shpreh Salianji.
Ai përfundoi duke theksuar se Partia Demokratike, sipas tij, ka ende forcën për të bërë ndryshimin dhe për të bashkuar demokratët e pakënaqur.
“Prania juaj sot më emocionon sepse tregon se ka ende shqiptarë që nuk janë dorëzuar, se ka ende demokratë që nuk e pranojnë këtë poshtërim”, tha Salianji.