Rusia po shqyrton legalizimin e kazinove online si një mënyrë për të rritur të ardhurat buxhetore, në kushtet e presionit financiar të shkaktuar nga kostot në rritje të luftës në Ukrainë.
Sipas gazetës ruse të biznesit Kommersant, ministri i Financave Anton Siluanov i ka dërguar presidentit Vladimir Putin një propozim zyrtar, ku sugjeron heqjen e ndalimit të kazinove online, të cilat janë të paligjshme në Rusi që prej vitit 2009.
Megjithëse të ndaluara, lojërat e fatit online kanë njohur një zgjerim të madh vitet e fundit. Ministria e Financave vlerëson se xhiroja e tregut të ligjshëm të basteve online dhe totalizatorëve ka arritur në 1.7 trilion rubla (rreth 22.2 miliardë dollarë) në vitin 2024. Ndërkohë, tregu i paligjshëm i kazinove online vlerësohet në rreth 3 trilion rubla (39.1 miliardë dollarë), me afro 100 platforma të jashtëligjshme aktive.
Sipas raportimit, propozimi parashikon krijimin e një sistemi të unifikuar monitorimi për bastet online, të ngjashëm me mekanizmat ekzistues për operatorët e licencuar, si dhe vendosjen e industrisë nën mbikëqyrjen e një rregullatori të vetëm. Ky institucion do të kishte përgjegjësi edhe për parandalimin e varësisë nga lojërat e fatit.
Paralelisht, agjencitë shtetërore do të intensifikonin përpjekjet për bllokimin e platformave të paligjshme.
Në letrën e tij, Siluanov vlerëson se vendosja e një takse mujore prej të paktën 30 për qind mbi të ardhurat bruto të kazinove online mund të sjellë rreth 100 miliardë rubla (1.3 miliardë dollarë) në vit për buxhetin federal.
Raporti nuk sqaron nëse presidenti Putin ka reaguar apo ka shprehur mbështetje për këtë iniciativë. Ndërkohë, ekspertë ndërkombëtarë paralajmërojnë se zgjerimi i industrisë së lojërave të fatit online shoqërohet me rritje të rasteve të varësisë, duke e konsideruar këtë një sfidë serioze për shëndetin publik.