Pandemia e Covid-19 ka theksuar rëndësinë e matjes së D-dimerit, një produkt i fibrinolizës që tregon prani të trombozës në trup. Pas pandemisë, shumë pacientë kërkojnë të masin D-dimerin, shpesh pa pasur nevojë për këtë analizë.
Mjeku reumatolog, Ervin Rapushi, shpjegon se D-dimeri mund të rritet në raste të infeksioneve virale, pneumonisë bakteriale, sëmundjeve autoimune dhe kancerit. Kjo rritje mund të tregojë mikrotrompoza, tromboza të plota, ose inflamacion në trup, dhe COVID-19 e bëri këtë më të dukshëm.
Ekspertët theksojnë se matja e D-dimerit nuk është e nevojshme për të gjithë individët, por duhet të bëhet në rastet kur ekzistojnë çrregullime të koagulimit të gjakut ose faktorë të tjerë rreziku. Mjeku Rapushi thekson se interpretimi i kësaj analize duhet bërë nga një mjek specialist, pasi vetëm ai mund të vlerësojë nëse rritja e D-dimerit është e lidhur me një sëmundje serioze apo është pasojë e një gjendjeje kalimtare.