Numri i aksidenteve rrugore në vend është në rritje, me mesatarisht një traumë çdo 5 minuta në urgjencën e ish-spitalit ushtarak. Vetëm në një ditë normale regjistrohen rreth 280 raste, ndërsa autoambulancat shpesh nuk arrijnë të reagojnë në kohë.
Sipas të dhënave të Skënder Brataj, krahasuar me 2023-n, ku u regjistruan afro 18 mijë aksidente, në 2024-n numri ka arritur në 19 mijë. Nga aksidentet me humbje jete, përllogaritet se dy persona të tjerë mbeten të paralizuar.
Shkaqet kryesore lidhen me neglizhencën e qytetarëve: mos përdorimi i rripit të sigurimit, mbajtja e fëmijëve të palidhur në makinë dhe sidomos vendosja e tyre në sediljen e parë. “Pjesa më e madhe e aksidenteve ndodhin në qytete, ku njerëzit e neglizhojnë përdorimin e rripit, edhe në autostradë e sidomos në qytet”, shprehet Brataj.
Ai shton se 50% e aksidenteve përfshijnë persona deri në 35 vjeç, të cilët shpesh paralizohen, duke sjellë një kosto ekonomike dhe sociale për familjet dhe shtetin, që do të duhet të asistojë për vite të tëra.
Në Tiranë është zhvilluar një konferencë ku mjekë të njohur nga Shqipëria dhe jashtë vendit diskutuan mbi menaxhimin e traumave dhe mënyrat për parandalimin e aksidenteve.