Një operacion i suksesshëm shpëtimi u zhvillua sot në monumentin natyror “Kanioni i Langaricës”, ku 14 turistë të huaj kishin mbetur të bllokuar për shkak të rritjes së papritur të nivelit të ujit në lumin e Langaricës.
Agjencia Kombëtare e Zonave të Mbrojtura (AKZM) bëri me dije se shpëtimi u realizua falë bashkëpunimit të ngushtë mes Policisë dhe shërbimeve zjarrfikëse.
“Komisariati i Policisë Përmet, në koordinim me zjarrfikësit dhe punonjësit e Administratës Rajonale të Zonave të Mbrojtura Gjirokastër, kontrolluan të gjithë zonën, lokalizuan turistët dhe organizuan aksionin e shpëtimit,” njoftoi AKZM.
Turistët u evakuuan të sigurt, ndërsa autoritetet bëjnë apel për kujdes dhe respektimin e udhëzimeve në zonat natyrore, veçanërisht gjatë reshjeve të shumta.
