Autoritetet turke kanë ngritur një aktakuzë të rëndë ndaj shtetasit kosovar Liridon Rexhepi, i cili akuzohet për bashkëpunim me shërbimin sekret izraelit MOSSAD, duke menaxhuar aktivitetin financiar të tij në Turqi. Sipas Zyrës së Hetimit të Krimeve Terroriste në Prokurorinë e Stambollit, Rexhepi pritet të përballet me një dënim që varion nga 18 vjet e 9 muaj deri në 35 vjet burgim për “spiunazh politik dhe ushtarak”.
Rexhepi dyshohet se ka hyrë në Turqi më 24 gusht 2024 përmes Aeroportit të Antalyas dhe është arrestuar më 3 shtator pas një operacioni të përbashkët të shërbimit sekret turk (MIT) dhe Policisë së Antiterrorit. Ai akuzohet se ka kryer transferta parash me persona të dyshuar si bashkëpunëtorë të MOSSAD-it, për qëllime të mbledhjes së informacionit të ndjeshëm.
Aktakuza përfshin edhe shtetasin turk Yıldıray Boztepe, i cili pranon se ka kryer incizime me dron për llogari të një personi të njohur si “Abdullah”, i dyshuar si agjent i MOSSAD-it. Boztepe ka deklaruar se ka marrë pagesa për këto shërbime përmes transferimeve të dërguara nga persona të tjerë në emër të Rexhepit.
Sipas dokumenteve të Prokurorisë, videot dhe fotografitë janë realizuar në zonat ku jetojnë shtetas palestinezë në Stamboll, në rrethinat e Büyükçekmece dhe Başakşehir, të cilët ishin strehuar në Turqi pas sulmeve të Izraelit në Palestinë.
Gjykimi ndaj të dyshuarve pritet të nisë së shpejti në Gjykatën e Lartë Penale të Stambollit. Autoritetet theksojnë se aktiviteti i tyre përbën një kërcënim serioz për sigurinë kombëtare turke.