Procesi i rinumërimit të votave në Qarkun e Fierit nuk duket se do të ndryshojë rezultatet për mandatet e deputetëve nga zgjedhjet e 11 majit. Kutitë u hapën pas kërkesës së Nismës Shqipëria Bëhet, që ngriti pretendime për një mandat të fituar nga PS, konkretisht atë të Zegjine Çaushit.
Nga rinumërimi rezulton se Partia Socialiste ka fituar rreth 15 vota shtesë, ndërsa Partia Demokratike ka humbur rreth 107 vota nga 428 kuti të rinumëruara nga 587 në total. Por më shumë se humbja ose fitimi i votave, bie në sy tjetërsimi i votave brenda kandidatëve të të njëjtës parti.
Zv.ministri i Energjitikës, Ceno Klosi, rezulton të ketë deri tani 921 vota më shumë në procesverbale sesa kanë rezultuar në kutitë e votimit. Dy kandidatët e tjerë socialistë, Klevis Jahaj dhe Antoneta Dhimes, kanë humbur respektivisht 454 dhe 92 vota, që mendohet se janë kaluar te Klosi. Po ashtu, edhe Zegjine Çaushit i janë tjetërsuar 63 vota.
Nga ana e Partisë Demokratike, Silva Hasaj ka humbur rreth 670 vota, duke rezultuar me më pak vota në rinumërim sesa në procesverbal. Ndërkohë, Gentian Çela ka 215 vota më shumë se në kuti, dhe Ajet Gurguri 92 vota më shumë, që besohet të jenë tjetërsuar nga demokratë të tjerë.
Me pak kuti të mbetura për rinumërim, mbetet e paqartë nëse Komisioni Qendror i Zgjedhjeve do të nisë ndjekjen ndaj komisionerëve që kanë shifra të ndryshme të votave të kandidatëve, si në rastin e Ceno Klosit.