Në episodin e sotëm të podkastit “Flasim”, kryeministri Edi Rama ka folur për protestat që, sipas tij, kanë hyrë në ditën e 15-të, duke komentuar edhe frymën dhe sjelljen e pjesëmarrësve në to.
Rama u shpreh se një pjesë e kësaj sjelljeje vjen nga individë që, sipas tij, ushtrojnë presion dhe kërcënime ndaj personave me mendime të ndryshme, duke përdorur një gjuhë të ashpër dhe duke i cilësuar disa prej tyre si “hajvanë”.
Ai kritikoi atë që e quajti “frymë fashiste”, duke e lidhur me qëndrime përjashtuese dhe intolerante ndaj mendimeve të ndryshme. Sipas tij, çdo përpjekje për të imponuar një opinion të vetëm në shoqëri përbën një rrezik për debatit publik dhe demokracinë.
Në deklaratën e tij, Rama theksoi se askush nuk duhet të detyrohet të mendojë në një mënyrë të caktuar dhe se presioni apo kërcënimi ndaj kundërshtarëve politikë duhet të ndalet.