Kryeministri Edi Rama, gjatë një takimi elektoral në Durrës, iu përgjigj me batuta kritikëve që e pyesin përse organizon takime vetëm me gra dhe vajza. Sipas tij, ky format është bërë “problem” vetëm për burrat “gjysmakë” dhe “çyrykë”.
Ai theksoi rritjen e përfaqësimit të grave në Partinë Socialiste, duke përmendur se nga vetëm 12% në fillim, tani janë rreth 40% dhe objektivi është të arrihet 50%.
Kryeministri u ndal edhe te diaspora, duke deklaruar se PS ka qenë forca që i “ngriti kokën” shqiptarëve në Itali, si dhe zgjidhi çështjen e pensioneve me këtë shtet. Ai ironizoi edhe një pjesë të burrave që e votonin opozitën, duke i cilësuar si “të dehurit e sherrit dhe bixhozit”.
“Pse bëj mbledhje me gra dhe vajza? Se ka filluar të behet problem nga burrat. Burrat që e bëjnë problem janë gjysmakë, çyryk. Kjo sepse nëse unë nuk kuptoj rolin tim krah gruas sime jam çyryk, edhe Shqipëria ishte një vend gjysmak, gjysmën e saj më të mirë nuk e kishte në funksion. Kur filluam këtë rrugë, në PS kishte 12% gra. Imagjinoni të keni 9 burra në shtëpi, 1 dhe mezi. Ça ti bësh asaj shtëpie? Kështu ishte Shqipëria. Sot kemi 40% gra. Nga 100 mijë anëtarë, kemi rreth 39 mijë gra. Ju nuk duhet të ndaleni derisa të bëheni 50%. Përfytyroni të merrni tragetin dhe të ikni 1 muaj, parapërfytyroni kur ktheheni në Durrës, çfarë gjeni këtu? Ça të them? Tmerr, burrat që vijojnë vërdallë që vetëm bishti nuk u ka dalë ende. Imagjinoni të ikin ata, në Durrës s’ka më asnjë të dehur. E dyta s’ka asnjë sherr, nga ato me të shara. Në Durrës nuk humb më asnjë qindarkë në bixhoz. Nuk gjen një bisht cigare në tokë. Jam shumë krenar që PS, 56% e grave dhe vajzave në Shqipëri votojnë PS. Te burrat është pak më e ngushtë. Ca të them për atë pjesë burrash që duan kënetën. Mund të jenë të mirë në jetën e përditshme, por janë çyryk në përgjegjësinë e jetës publike”, tha Rama.
Sipas tij, duke i dhënë pasaportën europiane, nuk i jep fëmijës dokument udhëtimi. “Kur merr pasaportën, je njësoj si ata. Atë votë nuk e keni tuajën, e keni dhe të fëmijëve. Nëse zgjidhni kënetën, nuk e di çfarë emri meritoni.
Kush ua ngriti kokën atyre në Itali? Që deri dje trembeshin kur thoshin që ishin shqiptarë. Është kthyer bota përmbys. Më shumë duan italianët të vijnë këtu për turizëm se sa të ikim ne andej. Kishin hallin e pensioneve, dhe atë e zgjidhëm ne. Të jesh në BE si emigrant me leje pune nuk është të jesh me një pasaportë evropianë të Shqipërisë.”, tha Rama.