Punimet për rrugën Berat–Ballaban po avancojnë me ritme të shpejta, duke afruar edhe më shumë Beratin dhe Gjirokastrën, dy qytete të mbrojtura nga UNESCO. Kryeministri Edi Rama njoftoi se shtresa e parë e asfaltit ka përfunduar në segmentin Ballaban–Zhitom, ndërsa në Zhitom–Drobonik po përgatitet terreni dhe po vendosen tombinot.
Aksi i ri prej 60 kilometrash pritet të shkurtojë kohën e udhëtimit nga jugu drejt Beratit dhe të krijojë një nyje të rëndësishme për turizmin kulturor dhe historik. Sipas Ramës, rruga do të rrisë numrin e vizitorëve, do të zhvillojë agroturizmin dhe do të gjallërojë ekonomikisht zonat rurale që prek.