Kryeministri Edi Rama, gjatë fjalës së mbajtur në aktivitetin për 35-vjetorin e Partisë Socialiste në Vlorë, u ndal te rëndësia e investimeve dhe zhvillimit ekonomik, duke theksuar se progresi i një vendi varet nga vizioni dhe ambicia për të ardhmen.
Duke folur për projektet e mëdha investuese, Rama tha se ndikimi i tyre shkon përtej kufijve të zonës ku realizohen, pasi krijojnë efekte pozitive në ekonomi, punësim dhe zhvillim.
“Ai investim nuk do të sjellë vetëm paratë, nuk do të ndërtojë vetëm vilat dhe hotelet, por do të sjellë një vlerë të shumëfishuar në të gjithë komponentët jashtë kufijve të tij. Është kjo që transformon me themel ekonomitë, jo ëndrrat e varfra”, u shpreh ai.
Kryeministri theksoi se pengesa më e madhe për zhvillimin e vendeve nuk është varfëria ekonomike, por mungesa e vizionit.
“Vendet nuk ngecin nga varfëria. Varfëria sulmohet, mundet dhe kapërcehet. Vendet ngecin kur kanë varfëri në ëndrra. Popujt ngecin nga njerëz që janë të varfër në ëndrra dhe të pangopur në interesat e tyre”, deklaroi Rama.
Në vijim të fjalës së tij, ai kritikoi atë që e cilësoi si retorikë populiste, duke paralajmëruar për pasojat që sjellin udhëheqësit që përçojnë mesazhe përjashtuese.
“Popujt ngecin kur udhëhiqen nga sharlatanë, si ata që ju thonë se ky vend është vetëm i juaji. ‘Ky vend është vetëm i juaji’, u thoshte Hitleri gjermanëve dhe ju e dini si mbaroi historia. Një nga popujt më me kulturë u mbulua nga një re e zezë”, tha Rama.
Sipas tij, zhvillimi i qëndrueshëm kërkon hapje, vizion dhe mbështetje për investimet që sjellin përfitime afatgjata për ekonominë dhe qytetarët.