Edi Rama e ka cilësuar Aktin Normativ të qeverisë si një “pasqyrë kuptimplotë” të rritjes ekonomike të vendit, duke theksuar se zgjerimi i hapësirës fiskale po reflektohet në politika sociale dhe investime publike.
Sipas qeverisë, paketa përfshin një bonus të ri prej 5 mijë lekësh për pensionistët, që do të nisë shpërndarjen nga nesër dhe do të përfshijë rreth 777 mijë përfitues, përfshirë pensionet e pleqërisë, invaliditetit dhe familjare.
Ministrja e Ekonomisë dhe Inovacionit Delina Ibrahimaj bëri të ditur se masa financohet nga rritja e të ardhurave buxhetore, me një efekt total rreth 3.7 miliardë lekë.
Rama theksoi gjithashtu se paketa shtrihet edhe në sektorë të tjerë si teknologjia, shëndetësia, bujqësia dhe mbrojtja, të cilën e quajti si financimin më të madh ndonjëherë për Forcat e Armatosura.
“Në ditët në vijim do të shpjegojmë çdo masë”, u shpreh ai, duke e lidhur bonusin edhe me të ardhurat shtesë nga rritja e çmimit të naftës.