Monedha vendase ka nisur muajin qershor me një ecuri të fortë në tregun e këmbimit valutor duke fituar terren ndaj valutave kryesore. Sipas kursit zyrtar të Bankës së Shqipërisë, leku është forcuar ndjeshëm sidomos kundrejt dollarit amerikan, i cili ka shënuar një rënie me 0,80 lekë krahasuar me fundjavën, duke zbritur në kuotën e 86,06 lekëve.
Në të njëjtën linjë, edhe euroja ka pësuar një zhvlerësim të lehtë prej 0,04 lekësh dhe po këmbehet me 98,35 lekë. Paundi britanik ka zbritur në 116,58 lekë me një rënie prej 0,35 lekësh ndërsa franga zvicerane këmbehet me 105,41 lekë, duke humbur 0,03 lekë krahasuar me ditët e mëparshme.
Lëvizjet e fundit në tregun valutor vijnë në një moment kur kërkesa për valutë nga tregtarët dhe eksportuesit është në rënie, ndërsa ofertat në euro dhe dollar janë shtuar për shkak të hyrjeve sezonale nga emigrantët dhe turizmi. Forcimi i lekut pritet të ndikojë në uljen e kostove për importuesit, por mund të rrisë presionin ndaj eksporteve shqiptare në afat të shkurtër.