Presidentja e Republikës së Kosovës, Vjosa Osmani, është kërcënuar sërish përmes një emaili të dërguar në orët e para të mëngjesit të 16 korrikut. Mesazhi është dërguar në adresën zyrtare të Zyrës së Presidentes nga një person me emrin “Betim Ibrahimi”, përmes një emaili personal (betimibrahimi@yahoo.com).
Në mesazhin e dërguar thuhej fillimisht: “Punoni pak ma shumë/shpejt”, por përmbajtja e mëtejshme kalonte kufijtë e çdo komunikimi institucional. Emaili përmbante gjuhë fyese, kërcënime të drejtpërdrejta dhe aludime për hakmarrje ndaj presidentes dhe familjes së saj, duke e akuzuar për “tradhti” për shkak të disa vendimeve politike si ndërrimi i flamurit apo përdorimi i gjuhëve në komunikimin zyrtar.
Në një pjesë të mesazhit thuhet:
“Edhe familja jote. Për tradhti. Për ndërrimin e flamurit tonë. Për ndjekjen e njerëzve dhe marrjen e vendimeve bazuar në mendimet e tyre… A janë shenjat në Serbi në të dyja gjuhët, shqip dhe serbisht?”
Sistemi i sigurisë së emailit të Presidencës e identifikoi menjëherë si mesazh të ardhur nga jashtë organizatës dhe e sinjalizoi automatikisht si të dyshimtë.
Deri tani nuk ka pasur një reagim zyrtar nga Presidenca apo Policia e Kosovës, por pritet që autoritetet të nisin hetimet për të identifikuar dhe proceduar personin përgjegjës.
Kjo nuk është hera e parë që Presidentja Osmani përballet me kërcënime të tilla — dhjetëra raste të ngjashme janë raportuar më parë, çka shton shqetësimet për sigurinë institucionale dhe personale të krerëve të shtetit.
