Një projektligj i ri për parandalimin e pastrimit të parave është hedhur për konsultim publik dhe synon të sjellë masa më të forta kontrolli mbi qarkullimin e parasë dhe asetet financiare, në përputhje me detyrimet e procesit të integrimit europian. Nisma përfshin për herë të parë edhe rregullime të detajuara për kriptoasetet, duke kërkuar që çdo transferim i tyre të shoqërohet me informacion të plotë dhe të verifikuar mbi identitetin e dërguesit dhe përfituesit, i cili duhet të jetë i pandryshueshëm dhe i gjurmueshëm.
Projektligji parashikon gjithashtu forcim të ndjeshëm të kontrollit mbi përdorimin e parasë “cash”, metaleve të çmuara dhe instrumenteve të parapaguara, duke vendosur kufizime të reja për transaksionet tregtare brenda vendit. Sipas draftit, pagesat me para në dorë nuk mund të kalojnë kufirin prej 10,000 eurosh, ndërsa në pikat kufitare bëhet i detyrueshëm deklarimi për çdo shumë të barabartë ose më të madhe se kjo vlerë.
Autoritetet doganore do të kenë gjithashtu të drejtën të bllokojnë përkohësisht fonde edhe nën pragun e deklarimit, në rast se ka dyshime apo indicie për lidhje me veprimtari kriminale. Masat shtrihen edhe te raportimi i blerjeve të luksit, ku parashikohen detyrime të posaçme për automjete mbi 250,000 euro dhe mjete lundruese apo fluturuese mbi 7.5 milionë euro, me qëllim rritjen e transparencës dhe gjurmueshmërisë së burimeve financiare.