Ish-deputeti demokrat Edmond Spaho ka kritikuar deklaratat e Sali Berishës për protestën e zhvilluar pranë Kuvendit, duke e akuzuar kreun e Partisë Demokratike se po gënjen qëllimisht kur pretendon se ndaj protestuesve janë përdorur lëndë kimike të ngjashme me ato të përdorura në luftë.
Përmes një reagimi, Spaho shprehet se armët kimike dhe përdorimi i tyre në fushëbetejë janë të ndaluara nga traktatet ndërkombëtare, duke e cilësuar pretendimin e Berishës si të pabesueshëm.
Sipas tij, dëshira për të ardhur në pushtet nuk mund të justifikojë deklarata që, në vlerësimin e tij, nuk përputhen me realitetin.
“Prandaj PD është bërë e pabesueshme për qytetarët dhe ata nuk e mbështesin. Të thuash se kundër protestuesve janë përdorur lëndë kimike si ato që përdoren në luftë do të thotë jo vetëm të kesh humbur sensin e realitetit, por edhe të gënjesh me qëllim”, shkruan Spaho.
Duke iu referuar drejtimit politik të Partisë Demokratike, ish-deputeti shprehet se kjo qasje mund ta mbajë forcën politike në opozitë për një kohë të gjatë.
“Dëshira për të ardhur në pushtet është e madhe, por në pushtet nuk vjen duke thënë broçkulla. Nëse PD ka zgjedhur këtë si rrugën e mundshme, do të mbetet edhe për një kohë shumë të gjatë në opozitë. Jo më kot thuhet: Koka bën, koka pëson”, përfundon ai.