Të paktën 11 persona, mes tyre katër fëmijë, janë vrarë në një sulm gjatë natës ndaj një zone turistike në një pjesë të rajonit të Zaporizhias, që kontrollohet nga Rusia.
Autoritetet lokale të emëruara nga Moska kanë akuzuar Ukrainën se ka sulmuar qëllimisht civilët. Kievi nuk ka reaguar menjëherë ndaj akuzave.
Sipas guvernatorit të emëruar nga Rusia për rajonin, Yevgeny Balitsky, 16 persona të tjerë mbetën të plagosur nga sulmi në zonën turistike të Kyrylivkës, e cila ndodhet në bregdetin e Detit Azov, pranë qytetit të Melitopolit.
“Armiku e pa dhe e kuptoi se kë po godiste”, shkroi Balitsky në aplikacionin e mesazheve Telegram.
Komiteti Hetimor i Rusisë ka nisur një hetim për terrorizëm lidhur me sulmin, raportoi agjencia shtetërore ruse e lajmeve RIA.
Si Rusia, ashtu edhe Ukraina mohojnë se kanë në shënjestër civilët në luftën që nisi pas pushtimit të plotë rus të Ukrainës në shkurt të vitit 2022.