Kualifikimi i Shqipërisë për herë të dytë në finalet e Europianit 2024 ishte një arritje e madhe për trajnerin Sylvinho, i cili për herë të parë në karrierën e tij si trajner përjetoi suksesin e një kompeticioni kaq të rëndësishëm.
Megjithatë, rinovimi i kontratës për ciklin e ri – eliminatoret e Botërorit – nuk ishte automatik. Ashtu siç parashikojnë marrëveshje të tilla, duhej kohë dhe negociata, pasi objektivat e vendosur për brazilianin ishin shumë më të larta: kualifikimi në Kupën e Botës 2026, në një grup të fortë me Anglinë, Serbinë, Letoninë dhe Andorrën.
Sot Shqipëria është më pranë se kurrë këtij objektivi historik. Kombëtarja u rendit e dyta pas Anglisë, duke siguruar mundësinë e artë të play-off-it, që mund ta çojë për herë të parë ndër 48 skuadrat pjesëmarrëse në Botërorin e SHBA-së, Kanadasë dhe Meksikës.
Fitoret ndaj Serbisë, vendi i dytë dhe optimizmi për një ëndërr që kurrë s’e kemi jetësuar, kanë ndezur entuziazmin e gjithë shqiptarëve. Bashkë me kreditet që merr ekipi për këto arritje, fiton patjetër edhe trajneri Sylvinho, si në aspektin profesional ashtu edhe financiar.
Sipas Endi Tufës nga Top Channel, trajneri brazilian ka përfituar një bonus të veçantë: pagesë për edhe tre muaj të tjerë pune, deri në mars, kur Shqipëria luan dy sfidat vendimtare të play-off-it (më 26 dhe 30 mars). Rezultati i këtyre ndeshjeve do të përcaktojë jo vetëm fatin e kuqezinjve për Botërorin, por edhe të ardhmen e Sylvinhos. Nëse arrihet objektivi, kontrata i rinovohet automatikisht; në të kundërt, do të hapen negociata të reja për vazhdimësinë e tij.