Një 45-vjeçar është plagosur në këmbë me armë zjarri gjatë një konflikti për motive të dobëta në Shkodër, ndërsa autori është arrestuar nga Policia brenda pak minutash.
Specialistët për Hetimin e Krimeve të Komisariatit të Policisë Shkodër, në bashkëpunim me specialistët e Krimeve të Rënda dhe me mbështetjen e Forcës së Posaçme “Shqiponja”, organizuan menjëherë punën për identifikimin e autorit dhe zbardhjen e rrethanave të ngjarjes, pasi morën njoftimin se në vendin e quajtur Ura e Dervishbeg, një shtetas kishte plagosur me armë zjarri një tjetër.
Falë reagimit të shpejtë të Policisë, u bë e mundur identifikimi dhe arrestimi i autorit të dyshuar, shtetasit I. G., 39 vjeç, pronar i një subjekti servis, i cili kishte pasur një konflikt për motive të dobëta me shtetasin G. H.
Në vendngjarje, Policia sekuestruar edhe armën e zjarrit, një pistoletë që autori e kishte me leje.
Vijon puna për dokumentimin e plotë ligjor të rastit. Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.