Ekspertët e sigurisë kibernetike kanë ngritur alarmin për një mashtrim gjithnjë e më të përhapur në WhatsApp, i njohur si “Hi Mum” (Përshëndje ma) një skemë që po dëmton rëndë qytetarët dhe po shfrytëzon emocionalisht prindërit nëpërmjet teknologjive të avancuara të imitimit të zërit.
Sipas mediave britanike, mashtruesit kanë arritur të përfitojnë më shumë se 490 mijë paund (mbi 500 mijë euro) vetëm gjatë vitit 2025, duke përdorur tani edhe inteligjencën artificiale për të imituar zërat e fëmijëve dhe familjarëve.
Mashtrimi nis në mënyrë shumë të thjeshtë: një mesazh i tipit “Hi Mum” ose “Hi Dad” vjen nga një numër i panjohur. Personi pas mesazhit pretendon se është fëmija i viktimës dhe shpjegon se ka humbur telefonin dhe nuk ka më akses në bankë apo në aplikacione të tjera. Më pas kërkohet ndihmë financiare urgjente për të paguar një qira, për të blerë një telefon të ri, apo për të zgjidhur një “problematikë të momentit”.
Në fazën më të avancuar të mashtrimit, përdoren zëra të krijuar me AI që imitojnë me saktësi të habitshme zërin e fëmijës – duke i shtuar kështu një shtresë tjetër bindjeje dhe duke e bërë viktimën të ndihet emocionalisht e detyruar për të ndihmuar.
Eksperti i sigurisë Jake Moore shpjegon se mashtruesit analizojnë videot dhe audion e postuar në rrjete sociale për të marrë disa sekonda zë të mjaftueshme, me të cilat më pas ndërtojnë mesazhe të personalizuara zanore. “Kjo teknologji i bën këta mashtrues jashtëzakonisht të besueshëm”, thotë ai.
Autoritetet këshillojnë qytetarët që të jenë gjithmonë dyshues ndaj kërkesave për para që vijnë përmes mesazheve të papritura, edhe nëse zëri i dërguesit duket i njohur. Gjithashtu, këshillohet që gjithmonë të konfirmohen kërkesat për ndihmë duke telefonuar drejtpërdrejt personin në fjalë ose një të afërm tjetër.