Një burrë 50-vjeçar është dënuar me një gjobë prej 4,500 eurosh dhe ndalim drejtimi për dy vjet e gjysmë nga Gjykata e Qarkut të Frankfurtit, pasi në maj të vitit 2023 arriti të anashkalojë masat e sigurisë në aeroportin e Frankfurtit dhe përqafoi kancelarin gjerman Olaf Scholz në pistë.
Incidenti ndodhi kur burri iu bashkua autokolonës zyrtare me një automjet privat, pa autorizim dhe nën ndikimin e drogës. Pasi ndaloi makinën, ai iu afrua Scholzit, i dha dorën dhe e përqafoi, përpara se të ndalohej nga forcat e sigurisë.
Në seancën gjyqësore, i akuzuari shprehu pendesë për veprimet e tij, duke kërkuar falje për gjithçka. Sipas prokurorit Christian Lang, çështja u përqendrua kryesisht në shkeljet e rënda të trafikut, ndërsa përqafimi ndaj kancelarit nuk ishte thelbi i akuzave.
Ky incident ngriti shqetësime serioze në Gjermani lidhur me sigurinë e figurave të larta shtetërore, duke nxitur debate mbi protokollet mbrojtëse të zyrtarëve të lartë.