Një konflikt mes disa personave ka degjeneruar në dhunë mbrëmjen e sotme në qytetin e Bilishtit, duke lënë të plagosur dy persona. Sipas informacioneve paraprake, tre shtetas kanë sulmuar një 39-vjeçar, të identifikuar me inicialet G.M., duke e goditur me sende të forta dhe duke i shkaktuar dëmtime të shumta në trup.
Pas sulmit, 39-vjeçari ka reaguar duke nxjerrë një thikë dhe ka plagosur njërin prej agresorëve. Ai është identifikuar si Trajan Çeliku, person me precedentë dhe i njohur për policinë si problematik.
Sipas burimeve, konflikti mes Çelikut dhe G.M.-së ka nisur paraditen e sotme për motive të dobëta dhe ka vijuar gjatë ditës. Më vonë, Çeliku është rikthyer për ta takuar 39-vjeçarin, këtë herë i shoqëruar nga dy persona të tjerë. Debati verbal është përshkallëzuar në dhunë fizike, duke çuar në përleshje të ashpër mes palëve.
Të dy të plagosurit janë dërguar në spital për ndihmë mjekësore dhe ndodhen jashtë rrezikut për jetën. Menjëherë pas mjekimit, të gjithë personat e përfshirë në konflikt janë shoqëruar në Komisariatin e Devollit, ku po merren në pyetje për zbardhjen e plotë të rrethanave të ngjarjes.
Policia ka nisur hetimet për të sqaruar motivet e sakta të sherrit dhe për të përcaktuar përgjegjësitë ligjore të secilit të përfshirë.