Pentagoni ka publikuar pamje tronditëse nga sulmi ajror ndaj objekteve të fortifikuara bërthamore në Iran, duke zbuluar përdorimin e 14 bombave të avancuara GBU-57 të tipit “bunker-buster”.
Në videon e publikuar të enjten, një prej bombave MOP (Massive Ordnance Penetrator) shihet teksa depërton në një strukturë të thellë nëntokësore, ndjekur nga një shpërthim masiv që ngrihet përmes një kanali ventilimi të uzinës së pasurimit të uraniumit në Fordow.
Pilotët që morën pjesë në operacion e përshkruan shpërthimin si “më i ndritshmi që kishin parë ndonjëherë”, duke shtuar se “dukej sikur ishte ditë e plotë” edhe në errësirë.
Në një deklaratë, gjenerali Dan Caine, Kryetar i Shefave të Shtabit të Përbashkët të SHBA-së, sqaroi:
“Këto nuk janë bomba të zakonshme që shpërthejnë në sipërfaqe. Janë krijuar për të depërtuar në thellësi dhe për të asgjësuar objektiva strategjikë nën tokë.”
Ky operacion i fundit vjen në vijim të tensioneve të shtuara mes SHBA-së dhe Iranit, dhe synon të godasë infrastrukturën bërthamore që vlerësohet si kërcënim për stabilitetin rajonal.