“PD është kthyer në kënetë”, – kështu deklaroi ish-deputeti Fatbardh Kadilli teksa komentoi foltoren e nisur nga Ervin Salianji. I ftuar në programin e mesditës në News24, Kadilli tha se ajo që po ndodh nuk është lëvizje politike, por thjesht një nismë e nxitur nga interesa personale.
Sipas tij, disa takime mes demokratëve – përfshirë atë në Durrës – mund të duken si gjallërim i Partisë Demokratike, por nuk përbëjnë aksion të mirëfilltë politik.
“Aq shumë kënetë është bërë PD-ja, sa edhe këto lëvizje i bëjnë mirë. Por unë nuk shoh aksion politik. Interesi personal po mbivendoset mbi interesin e partisë”, u shpreh Kadilli.
Ai kërkoi që Salianji dhe të tjerë të deklarojnë hapur me kë po luftojnë brenda PD-së, nëse përplasja është me Flamur Nokën, Belind Këlliçin apo figura të tjera.
“Kjo është histori karriere, jo politikë. Politika nuk bëhet me statute, dhe s’pranoj që kushdo që flet ndryshe të përjashtohet. Ky është mentalitet bolshevik”, theksoi ai, duke shtuar se PD ka nevojë për riformatim të thellë.