Një muaj pas skandalit të bujshëm në koncertin e “Coldplay”, ku Kristin Cabot u filmua në krahët e shefit të saj Andy Byron nga kamera e famshme “Kiss Cam”, ka ardhur edhe reagimi i parë publik nga ish-bashkëshorti i saj, sipërmarrësi Andrew Cabot.
Pamjet bënë xhiron e botës, shoqëruar me humorin e këngëtarit Chris Martin, i cili u shpreh: “Ose janë në një lidhje të fshehtë, ose kanë shumë turp.” Vetëm disa javë më vonë, Kristin paraqiti kërkesën për divorc në New Hampshire.
Përmes një zëdhënëseje, Andrew, CEO 61-vjeçar i kompanisë “Privateer Rum”, theksoi se martesa kishte marrë fund përpara incidentit publik. “Vendimi për divorc ishte marrë tashmë. Tani Andrew shpreson që kjo të mbyllë spekulimet dhe t’i japë familjes privatësinë që e ka vlerësuar gjithmonë,” – u shpreh zëdhënësja.
Kristin dhe Byron, i cili është gjithashtu i martuar, u larguan nga kompania ku punonin së bashku, “Astronomer”. CEO i përkohshëm, Pete DeJoy, reagoi duke thënë se pavarësisht situatës së sikletshme, kompania ka treguar qëndrueshmëri: “Edhe pse nuk do të doja të ndodhte në këtë mënyrë, Astronomer tani është bërë një emër i njohur.”
Skandali i Cabot–Byron ndezi një valë memesh dhe debat të gjerë mbi kufijtë e privatësisë në epokën digjitale, ndërsa jeta personale e ish-çiftit mbetet në qendër të vëmendjes mediatike.