Vetëm disa ditë pas shpalljes “person non grata” të gazetarit Artan Hoxha, Greqia ka marrë të njëjtën masë edhe ndaj Aulon Kalasë.
Gazetari bëri me dije lajmin përmes një postimi në rrjetet sociale, duke thënë se ka mësuar në rrugë jozyrtare se mbi të rëndojnë dy akuza: vendosje në rrezik të sigurisë kombëtare të Greqisë dhe akuzë për racizëm.
Kalaja sqaron se konsideron këtë vendim të padrejtë dhe se ai lidhet me aktivitetin e tij si gazetar dhe aktivist. Ai përmend organizimin e protestave kundër marrëveshjes për detin me Greqinë dhe publikimin e dokumentarit “Drejtësi për Pëllumbin”, që zbardh rastin e vrasjes së Pëllumb Marnikollajt dhe të mbi 200 shqiptarëve të tjerë nga policia dhe autoritetet greke.
Gazetari thekson se masa “non grata” i është komunikuar për herë të parë në kufi më 20 korrik 2019 dhe se ai nuk ka marrë asnjë njoftim zyrtar nga autoritetet greke, duke e lënë pa mundësi të ndjekë rrugë ligjore në shtetin fqinj. Kalaja nënvizon se pavarësisht kësaj mase, nuk do të ndalet në veprimtarinë e tij patriotike dhe gazetare.
Ai paralajmëron se do të ndjekë çdo rrugë ligjore për të rivendosur dinjitetin e tij, duke përfshirë edhe Gjykatën Europiane për të Drejtat e Njeriut në Strasburg.