Ministria e Brendshme e Gjermanisë ka paralajmëruar për një rritje të dukshme të rrezikut nga aktivitete sabotuese në vend, pas arrestimit të 11 personave në Serbi që dyshohen për përfshirje në incidente të ndodhura në Gjermani dhe Francë. Paralajmërimi u bë publik të mërkurën nga një zëdhënës i Ministrisë për Shërbimin e Ballkanit të Radios Evropa e Lirë.
Personat e arrestuar në Serbi më 29 shtator, në qytetin e Smederevës, akuzohen për nxitje të grupit për të kryer vepra penale, diskriminim racor dhe spiunazh. Ata dyshohen se janë përfshirë në një sërë aktesh provokuese në Evropë, përfshirë hedhjen e ngjyrës së gjelbër mbi Muzeun e Holokaustit, sinagoga dhe një restorant hebraik në Paris, si dhe vendosjen e kokave të derrave pranë vendeve të kultit mysliman në të njëjtin qytet.
Gjithashtu, grupi dyshohet për shkrimin e mesazheve diskriminuese pranë Portës së Brandenburgut në Berlin, një simbol i rëndësishëm historik dhe politik në Gjermani.
“Shërbimet federale të sigurisë po hetojnë gjithashtu raste në të cilat individë dyshohet se janë rekrutuar nga shërbime të huaja inteligjente për të kryer akte të tilla,” tha zëdhënësi gjerman për REL, duke theksuar se këto rekrutime shpesh ndodhin në mënyrë të fshehtë përmes rrjeteve sociale dhe platformave të mesazheve.
Autoritetet gjermane kanë nisur një fushatë paralajmëruese përmes mediave, me qëllim që të informojnë publikun dhe të pengojnë rekrutimet e mundshme nga shërbime të huaja armiqësore.
Ndërkohë, policia serbe njoftoi se po kërkon një të dyshuar që, “nën udhëzimet e një shërbimi të inteligjencës së huaj”, ka organizuar dhe trajnuar një grup qytetarësh serbë për të kryer incidente në Gjermani dhe Francë.
Në Francë, autoritetet kanë hapur një hetim për të përcaktuar nëse pas këtyre incidenteve qëndron Rusia, duke i cilësuar ato si operacione destabilizuese që synojnë të nxisin tensione shoqërore dhe përçarje. Megjithatë, në deklaratat e policisë dhe prokurorisë serbe Rusia nuk përmendet drejtpërdrejt dhe pyetjet e Radios Evropa e Lirë për identitetin e shërbimit të inteligjencës që qëndron pas trajnimit të grupit nuk morën përgjigje.