Presidenti turk Recep Tayyip Erdogan ka përshëndetur çarmatosjen e pjesëtarëve të Partisë së Punëtorëve të Kurdistanit (PKK), duke e quajtur një hap historik drejt përfundimit të konfliktit disa dekadash me këtë grup.
Tridhjetë militantë të PKK-së dogjën armët e tyre në veri të Irakut, në një akt simbolik që shënon fillimin e shpërbërjes së organizatës pas një thirrjeje nga lideri i saj i burgosur, Abdullah Ocalan.
“Plaga e terrorizmit po mbyllet. Sot hapet një faqe e re për një Turqi të bashkuar dhe të fuqishme,” deklaroi Erdogan para anëtarëve të partisë së tij në Ankara, duke njoftuar se parlamenti do të luajë rol kyç në hartimin e kornizës ligjore për këtë tranzicion.
Ankaraja po ndërmerr hapa për krijimin e një komisioni parlamentar që do të mbikëqyrë çarmatimin dhe integrimin politik të ish-militantëve. Nëse kjo iniciativë arrin sukses, do t’i jepte fund një konflikti që ka lënë mbi 40 mijë të vdekur dhe ka lënë gjurmë të thella në shoqërinë turke dhe rajon.