Presidentja e Kosovës, Vjosa Osmani, ka dorëzuar një kërkesë në Gjykatën Kushtetuese lidhur me krizën institucionale të krijuar nga moskonstituimi i Kuvendit brenda afatit kushtetues. Në një konferencë për media, Osmani deklaroi se ka vepruar në përmbushje të detyrës së saj për të garantuar funksionimin demokratik të institucioneve të vendit.
Ajo theksoi se po krijohen konflikte të kompetencave mes institucioneve dhe se vendimi i mëparshëm i Gjykatës Kushtetuese nuk ka qartësuar pasojat juridike në rast të mosrespektimit të afatit 30-ditor për konstituimin e Kuvendit.
“Qëllimi i kësaj kërkese është parandalimi i pasojave të pariparueshme dhe sqarimi i përgjegjësive institucionale në mungesë të Kuvendit të konstituuar,” deklaroi presidentja, duke shtuar se kërkesa ka karakter preventiv dhe nuk paragjykon rezultatin e procesit.
Osmani nënvizoi se nëse Kuvendi arrin të konstituohet brenda afatit ligjor, ajo do të tërheqë kërkesën, por theksoi rëndësinë që Gjykata Kushtetuese të trajtojë çështjen me përparësi për shkak të rrethanave të jashtëzakonshme.