Në një rrëfim të ndjerë në podcastin e Grida Dumës, këngëtarja e njohur Elsa Lila ka ndarë për herë të parë emocionet dhe tronditjen që përjetoi në momentin kur u arrestua në Itali dhe u akuzua për përfshirje në veprimtari kriminale.
“Ke një akuzë 20 vite e lart, dhe gjëja e parë që mendova ishte: Çfarë mund të kem bërë unë për ta merituar këtë? Ndoshta ndonjë gjobë makine, por ajo nuk vlen 20 vite,” – tregoi Elsa, duke përshkruar momentin kur karabinierët i komunikuan akuzën.
E tronditur përballë prangave, ajo tha se ka kaluar dilema të forta:
“Të gjithë kemi anë të errëta dhe të ndriçuara. Ndoshta kam lënduar dikë, ndoshta pa dashje, por kurrë për të merituar burg,” – u shpreh këngëtarja.
Përjetimet e saj gjatë muajve të përballjes me drejtësinë italiane, Elsa Lila i ka përmbledhur në librin e saj “Mirë se erdhe në Rebibbia”, ku rrëfen me sinqeritet sfidat, frikërat dhe forcat që e mbajtën gjallë në momentet më të vështira të jetës.