Një 49-vjeçar nga Fushë Kosova është dënuar me 7 muaj burg, një gjobë prej 500 eurosh, si dhe detyrim për të kthyer shumën prej 193 euro që gjeti në një kuletë në rrugë, të cilën nuk e dorëzoi në polici.
Ngjarja ndodhi më herët këtë vit, ndërsa Gjykata Themelore në Prishtinë e shpalli fajtor më 24 shkurt 2025 për veprën penale “Shpërdorim i pasurisë së huaj”.
I akuzuari e pranoi veprën para trupit gjykues, duke deklaruar se vendimi për të mbajtur kuletën u mor nën presionin e gjendjes së rëndë ekonomike, ndërsa kujdesej i vetëm për dy vajzat e tij të mitura.
“Veprova nga halli. Nuk kisha asnjë mundësi tjetër atë muaj”, tha ai në gjykatë.
Avokati i tij, Bajram Zogiani, e cilësoi vendimin si të ashpër dhe të padrejtë, duke paralajmëruar ankesë në shkallë të dytë. Sipas tij, rrethanat jetësore të klientit duhet të ishin marrë më shumë në konsideratë nga gjykata.