Reperi i njohur shqiptar, Noizy, është arrestuar të shtunën në Aeroportin e Zyrihut nga autoritetet zvicerane, nën urdhër të Zyrës së Prokurorit Publik për Krime të Rënda të Dhunshme. Arrestimi është konfirmuar zyrtarisht nga Policia e Kantonit të Zyrihut, ndërsa detajet mbi akuzat specifike ndaj tij nuk janë bërë ende publike.
Sipas medias zvicerane “Watson.ch”, Prokuroria ka kërkuar që Noizy, emri i vërtetë i të cilit është Rigels Rajku, të mbahet në paraburgim, ndërkohë që vendimi i gjykatës pritet. Deri në shpalljen e një vendimi përfundimtar, mbi reperin mbetet prezumimi i pafajësisë.
Në raportimin e saj, media përmend edhe lidhjet publike të reperit me politikën shqiptare:
“Gjatë fushatës së tij zgjedhore dhe pas rizgjedhjes së suksesshme, kryeministri i Shqipërisë, Edi Rama, performoi gjithashtu me Noizyn në skenë,” – shkruan “Watson.ch”.
Arrestimi e gjeti Noizyn në prag të një eventi të planifikuar në klubin Rinora 4 në Rümlang, ku do të prezantonte albumin e tij të ri. Ngjarja u anulua menjëherë pas ndalimit të tij dhe postimet në rrjete sociale për koncertin janë fshirë.
Noizy ka një audiencë të gjerë me gati 4 milionë dëgjues në Spotify dhe mbi 2 milionë ndjekës në Instagram, çka e bën një nga figurat më të ndjekura të muzikës moderne shqiptare në diasporë.
Autoritetet zvicerane nuk kanë dhënë ende informacion për arsyet e saktësuara të ndalimit apo për ndonjë lidhje me ndonjë ngjarje të mëparshme të dhunshme.