Një person i armatosur është qëlluar për vdekje pasi depërtoi në perimetrin e sigurisë së rezidencës Mar-a-Lago, pronë e presidentit amerikan Donald Trump.
Sipas një njoftimi zyrtar nga United States Secret Service, incidenti ndodhi rreth orës 06:30 të mëngjesit, kur një burrë rreth të 20-ave u vu re pranë portës veriore të kompleksit. Ai dyshohet se mbante me vete një pushkë gjahu dhe një bidon me karburant.
Agjentët e Shërbimit Sekret, në bashkëpunim me një përfaqësues të Palm Beach County Sheriff’s Office, u përballën me të dyshuarin. Gjatë ndërhyrjes pati shkëmbim zjarri, ku personi i armatosur mbeti i vrarë.
Autoritetet konfirmuan se në momentin e ngjarjes asnjë person nën mbrojtjen e Shërbimit Sekret nuk ndodhej në rezidencë. Sipas axhendës publike, presidenti Trump ndodhej në White House gjatë fundjavës.
Hetimet për zbardhjen e plotë të rrethanave të incidentit vijojnë.