Në selinë e Juventusit, enigma Dushan Vlahoviç vazhdon të qëndrojë pezull, duke ndikuar në atmosferën e merkatos bardhezi.
Klubi dëshiron ta shesë sulmuesin serb përpara përfundimit të kontratës në vitin 2026, ndërsa vetë lojtari po shijon ditët e fundit të pushimeve, duke zgjedhur heshtjen, një heshtje që po bëhet gjithnjë e më e zhurmshme. Në Kontinasa, drejtuesit tashmë e kanë të qartë rrugën që duhet ndjekur, shitja është alternativa më e logjikshme për momentin, si për arsye financiare ashtu edhe për bilancin e skuadrës.
Vlahoviç përfiton aktualisht një pagë prej 12 milionë euro në sezon, një barrë e rëndë për arkat e klubit që po përpiqet të rindërtojë me kujdes pas një periudhe të trazuar. Megjithatë, deri tani, Vlahoviç ka refuzuar çdo mundësi konkrete për largim. Nga ofertat e pasura që vijnë nga Arabia Saudite, deri te interesimi i Fenerbahçes, sulmuesi serb ka mbetur i palëkundur në pozicionin e tij. Agjenti i tij, Darko Ristiç, vazhdon të mbajë kontakte, por zgjidhja duket ende larg.
Situata është e tensionuar, por të dyja palët po përpiqen të mos e përshkallëzojnë konfliktin. Juventusi e ka të qartë që, për sa kohë lojtari mbetet pjesë e ekipit, ai nuk do të trajtohet si “i padëshiruar”. Vlahoviç do të vazhdojë të jetë pjesë e grupit të Tudor, të paktën deri në një zhvillim të ri. Që nga data 27 qershori, Vlahoviç nuk ka bërë asnjë postim në rrjetet sociale. Ai ka mbyllur edhe komentet në postimet e mëparshme, një sinjal i qartë i dëshirës për t’iu shmangur debateve, thashethemeve dhe, mbi të gjitha, reagimeve të ashpra të tifozëve./PanoramaSport