OSHEE Group ka nisur zbatimin e skemave të reja lehtësuese për pagesën me këste të detyrimeve të prapambetura të energjisë elektrike. Skema zbatohet nga Furnizuesi i Shërbimit Universal (FSHU) dhe përfshin faturat e krijuara deri më 31 dhjetor 2024, duke ofruar mundësi më të lehta shlyerjeje për qytetarët dhe bizneset.
Këste të reduktuara për kategoritë në nevojë
Klientët familjarë që përfitojnë ndihmë ekonomike, pensionistët kryefamiljarë dhe personat me status të veçantë mund të lidhin akt-marrëveshje për shlyerjen e detyrimeve deri më 31 dhjetor 2025, me këste që nisin nga 1,200 lekë në muaj, me kusht që të mos kenë detyrime të reja për vitin 2026.
Ndërsa klientët e tjerë familjarë mund të shlyejnë faturat e prapambetura deri më 31 dhjetor 2024 me këste mujore që nisin nga 2,800 lekë.
Numri maksimal i kësteve: deri në 240 muaj
Klienti mund të zgjedhë edhe një këst më të lartë se minimumi, por pa kaluar kufirin e 240 kësteve.
Skema për institucione dhe biznese
Për kategoritë buxhetore dhe jo-buxhetore, këstet përcaktohen sipas vlerës së detyrimit:
24 këste – 100,000 deri 500,000 lekë
48 këste – 500,001 deri 1,000,000 lekë
60 këste – 1,000,001 deri 5,000,000 lekë
84 këste – 5,000,001 deri 10,000,000 lekë
120 këste – mbi 10,000,000 lekë
Skemë speciale për disa fatura
Për faturat korrektive, përmbledhëse apo rastet e testimit të matësit, detyrimet mund të paguhen deri në 24 këste.
Ulje të mëdha të kamatvonesave
Nëse detyrimi shlyhet me një këst të vetëm, aplikohen ulje të konsiderueshme të kamatave:
70% ulje për klientët familjarë
50% ulje për klientët jofamiljarë
100% falje për biznesin e vogël
Kushtet për përfitim
Për të hyrë në skemë, klientët duhet:
të kenë shlyer faturat e vitit 2025 dhe në vijim;
të paguajnë këstin e parë brenda 7 ditëve nga nënshkrimi i marrëveshjes;
të vijojnë me pagesa mujore të rregullta deri në shlyerjen e plotë.
Sipas OSHEE Group, skemat synojnë të ndihmojnë qytetarët që kanë vështirësi financiare, por edhe të rrisin stabilitetin financiar të kompanisë për të garantuar furnizim të sigurt me energji në të ardhmen.