Një ngjarje e rëndë u regjistrua pasditen e së enjtes te rrethrrotullimi i Rinasit, rreth 300 metra larg mbikalimit. Sipas informacioneve paraprake, një person ka përplasur katër automjete dhe më pas ka dalë në rrugë duke mbajtur një hanxhar dhe duke kërcënuar kalimtarët.
Tre efektivë të Forcave të Armatosura, të pranishëm rastësisht në vendngjarje, ndërhynë menjëherë. Ata e shtrinë për tokë, i morën armën e ftohtë dhe e vunë në pranga, duke e mbajtur të neutralizuar deri në mbërritjen e Policisë. Identiteti i personit nuk është bërë i ditur.
Ngjarja u bë e njohur nga një qytetar që kontaktoi redaksinë e JOQ, duke sqaruar se i riu kishte ndjekur dhe kërcënuar kalimtarët pas përplasjes së makinave, ndërsa ndërhyrja e efektivëve të forcave speciale të marinës detare (grupi i boarding-ut) e ndaloi situatën para se të përshkallëzohej.
Autoritetet pritet të japin më shumë detaje zyrtare për ngjarjen.