ITALI– Trajneri i Milanit, Masimiliano Alegri, është i bindur se do të arrijë të rikthejë në formën më të mirë Santiago Gimenez, pas një periudhe të vështirë për shkak dëmtimi.
Pas një rikuperimi të gjatë nga operacioni në kyçin e këmbës në fund të dhjetorit, Gimenez u rikthye në fushë në ndeshjen Milan-Torino. Sipas “La Gazzetta dello Sport”, Alegri po mbështetet shumë te golat e tij dhe ka vënë re një version të përmirësuar të sulmuesit meksikan. Problemet në kyç janë zhdukur dhe puna fizike gjatë muajve të fundit e ka ndihmuar të rikthehet më i fortë dhe me një fizik më të konsoliduar.
Megjithatë, në këtë sezon kampionati, Gimenez ende nuk ka shënuar, pavarësisht rreth 640 minutave në fushë. Ndërkohë, sezonin e kaluar, pasi u bashkua në janar dhe luajti 670 minuta, ai realizoi 5 gola në 14 ndeshje. Te Milani besojnë se “Gimenez i vërtetë” mund të shpërthejë sërish me fanellën kuqezi.
Alegri synon ta shfrytëzojë maksimalisht në fazën përfundimtare të sezonit. Për ta ndihmuar të rikthejë ritmin e ndeshjeve, trajneri ka organizuar një miqësore stërvitore ndaj Milan Futuro, ku Gimenez pritet të aktivizohet si titullar./PanoramaSport