Një grua nga Tirana ka denoncuar një rast të rëndë fajdeje, mashtrimi dhe zhvatjeje, i cili përfundoi me humbjen e makinës së saj dhe largimin nga vendi për shkak të kërcënimeve të vazhdueshme.
Sipas rrëfimit të saj, i bërë publik edhe në një emision investigativ, gjithçka nisi kur bashkëshorti i saj mori një hua prej 1 milion lekësh nga një person me precedentë penalë, i dënuar më parë për fajde. Marrëveshja përfshinte pagesa mujore prej 200 eurosh, por borxhi nuk ulej, pasi interesi rritej në mënyrë arbitrare dhe kushtet ndryshonin vazhdimisht sipas dëshirës së fajdexhiut.
“Filloi ta kërcënonte dhe t’i kërkonte më shumë para. I dërgonte mesazhe me shantazhe për dhunë fizike,” tregon ajo. Për shkak të frikës, ajo pranon se nënshkroi një prokurë për përdorimin e makinës. Më vonë, zbuloi se personi në fjalë kishte kaluar lejen e qarkullimit në emrin e tij – duke ia shitur makinën vetes në mënyrë të njëanshme dhe pa dijeninë e saj.
“Makina ime vlente katërfishin e shumës që ai i kishte dhënë burrit tim. Ai nuk mund të marrë pasurinë time për një borxh të paligjshëm që nuk ishte as në emrin tim,” – thotë ajo, ndërsa thekson se prej muajsh nuk jeton më në Shqipëri për shkak të kërcënimeve të vazhdueshme për jetën.
Në përpjekje për të rikuperuar makinën, ajo ka kontaktuar noteren që ka hartuar dokumentin, por kjo e fundit e ka konsideruar aktin të vlefshëm, duke deklaruar: “Ju ia keni dhënë me dëshirë. Unë nuk di çfarë marrëdhënie keni pasur me të”.
Personi që ka marrë makinën ka pranuar në një bisedë telefonike se nuk e ka takuar kurrë gruan personalisht dhe refuzon të japë detaje mbi shumën e borxhit, por i kërkon asaj: “Më sillni lekët që t’jua jap makinën”.
Rasti përbën një shembull tipik të fajdes, e cila është e ndaluar nga Kodi Penal i Republikës së Shqipërisë, sipas nenit 143/a, të ndryshuar më 3 prill 2024. Ligji parashikon dënime nga 3 deri në 10 vjet burg për organizimin e skemave të huamarrjes mashtruese dhe zhvatëse.
Zonja i bën thirrje institucioneve të drejtësisë dhe medias të mos mbyllin sytë ndaj këtyre rasteve, që po godasin shtresat më të pambrojtura të shoqërisë:
“Nuk mund të lejohet që për një borxh të paligjshëm prej 1 milion lekësh të më merren 4 milionë lekë pasuri. Nuk mund të lejojmë që fajdexhinjtë të bëjnë ligjin, të kërcënojnë njerëzit dhe t’u marrin pronën”, – apelon ajo.