LONDËR – Një rrjet i organizuar për trafikun e emigrantëve drejt Mbretërisë së Bashkuar është goditur nga Metropolitan Police Service, duke çuar në dënimin e tre shtetasve shqiptarë me mbi 15 vite burg në total.
Hetimet zbuluan një skemë të sofistikuar, ku emigrantët transportoheshin fillimisht me kamionë, për t’u transferuar më pas në automjete të tjera, përpara se të mbërrinin në Londër. Stacionet e karburantit përgjatë autostradës M25 dhe më gjerë përdoreshin si pika kyçe për këto transferime.
Gjatë hetimeve, autoritetet përdorën kamerat e sigurisë, gjurmimin e automjeteve dhe mbikëqyrje të drejtpërdrejtë. U evidentuan edhe biseda midis kontrabandistëve dhe shoferëve, duke organizuar pikën e takimit dhe transferimet e emigrantëve. Detektivët përcaktuan se të paktën 20 shqiptarë u sollën në Londër gjatë 18 muajve të aktivitetit të bandës, por dyshohet se numri real është shumë më i madh.
Policia nënvizoi se këto aktivitete nuk janë krime pa viktima: “Shumë nga personat e trafikuar shpesh shfrytëzohen nga rrjetet kriminale që i sollën ata, duke nxitur më tej aktivitet kriminal në kryeqytet dhe më gjerë,” tha inspektori detektiv në detyrë Stuart Jack, i cili drejtoi hetimin.
Dënimet e tre shqiptarëve:
- Toni Liko, 42 vjeç nga Ealing Road, Wembley – 5 vite e 8 muaj burg
- Klement Gjika, 44 vjeç nga Hemingford Road, Islington – 5 vite e 8 muaj burg
- Stelian Bodnariu, 37 vjeç nga Park Way, Edgware – 3 vite e 4 muaj burg
Tre të pandehurit u arrestuan më 18 qershor 2025 dhe, pas një gjyqi shtatë-javor në Southwark Crown Court, u shpallën fajtorë për komplot për lehtësimin e emigracionit të paligjshëm.
Metropolitan Police bëri apel që shoferët e automjeteve të jenë vigjilentë dhe të raportojnë çdo aktivitet të dyshimtë, duke theksuar se ky rrjet vepronte për fitim financiar, duke shfrytëzuar personat e cenueshëm dhe duke rritur krimin e organizuar në Londër.